可惜，原來對方唔係通知佢幾時可以開工，而係話畀佢聽一早已經搵到合適人選。空歡喜一場都算啦，仲要畀人窒，話啲資料畀咗勞工處成個幾禮拜喎，點解咁遲先至嚟申請，難怪呢位求職者一肚火。

你估失業好過癮咩？有邊個求職者唔想早啲見工，早啲返工吖？反之亦然，好多公司都係十萬火急等人用至請人，等一日半日都嫌長啦。弊在勞工處收到職位空缺資料之後，往往拖成個星期至貼出嚟。正如立法會人力事務委員會委員王國興所講：「空缺唔等人。」拖得兩拖，最新求職消息變咗過時舊料，有空缺變冇空缺，分明靠害。

事實上，呢個畸屎只係冰山一角，本報記者試過根據勞工處職位空缺處理中心資料聯絡咗四名僱主，結果全部異口同聲話一早請咗人。有間公司職員仲反問：「你今日先睇到？啲資料畀咗勞工處個幾禮拜喎，政府做嘢唔係咁慢啩？」

政府做嘢的確慢到你唔信。又難怪喎，成班官老爺拎住個鐵飯碗，唔怕裁員不特止，仲可以獅子開大口嗌逆市加人工，佢哋點會明白人浮於事係幾咁痛苦嘅一件事吖？

查實本報早喺○七年底，踢爆過勞工處龜速更新網上職位空缺，令到好多求職者食白果，估唔到事隔兩年，呢隻烏龜仲愈爬愈慢，令到好多求職者白白錯失搵工良機。

難為勞工處知錯唔改，仲喺度死雞撐飯蓋，狡辯話近日接到嘅空缺數目持續增加，令到部分空缺資料唔能夠及時處理咁話，你信唔信吖？

冇錯，最新失業率雖然微跌零點一個百分點，但仍然屬於高企，有超過二十萬人冇嘢做呀，仲話就業市場好到資料處理唔切？三歲細路仔都唔信啦。

講到底，原因簡單到極，咪就係懶囉。勞工處唔單止懶處理空缺資料，同時又懶監管招聘內容，於是有時即使份工資料未過期，好多都屬於豬頭骨，食之無味，棄之可惜，完全係得啖笑。

舉個例，勞工處網上職位空缺曾經登過一份招聘飲食業文員廣告，要識中英粵三語，每個星期返六日，每日做足八個半小時，你估人工有幾多？四千五百大元咋，待遇隨時仲差過包食包住嘅外傭呀！勞工處竟懵然不知，被人踢爆咗至話會跟進有關個案，可見佢哋平時返工都係瞌眼瞓居多。

唔緊要，功夫茶介紹一份筍工，就係年薪閒閒地百幾二百萬嘅副局長嘞，如果自問係屬於煲呔曾嘅圍威畏自己友，唔使去勞工處頻頻撲撲o架，安坐家中等收電話啦！