呢句話認真可圈可點。本報日前早已撰文，提及今年車公廟籤文其中一句「禍來禍去因自招」，講中晒煲呔曾為一己私欲引發連串利益輸送風波。肥平尋日出席一個基金會成立活動時亦有感而發，問佢作為前高官，點睇慳電膽風波搞到民怨沸騰，肥平笑騎騎拍拍記者膊頭話：「車公支下籤真係好靈㗎！」唔通佢睇完本報後都心領神會？

肥平觀察時弊挑通眼眉，皆因佢離開官場後視野更廣，啱啱出席完希臘一個名為國際文明對話嘅會議，會上嘉賓包括德國前總統，肥平喺會上大談中國未來發展要重視道德教育，要以德服人。雖然外國人聽得麻麻哋明，但肥平唔介意嘥口水講到對方明為止。

吳清輝買唔起樓

喺尋日活動上，仲見到明年六月底退休嘅浸大校長吳清輝。吳校長皺眉話，退休後未有容身之所，好慘！何解咁淒涼？原來吳校長廿幾年一直住喺浸大提供嘅宿舍，諗住退休後先至置業安老，殊不知呢排豪宅屢創天價，想搵間心水樓都難。

唉！連堂堂一個大學校長都話買唔起樓，煲呔曾話豪宅升唔會影響民生就假囉。