行政會議前成員田北俊日前左右開弓，既批評部分現任行會成員同政府唱反調，又批評政府因為弱勢無嚴肅整頓行會，進一步削弱管治威信。行會成員唱反調係咪應驗年初車公靈籤籤文「內有家鬼」就唔知嘞，但稱得上「穩陣派」嘅行會成員梁智鴻（金刀梁）就提醒其他行會同僚，入得行會就必須恪守行會兩個基本大原則。
金刀梁尋日開完行會後路過中環港鐵站，問佢點睇田少批評有行會成員同政府唱反調？金刀梁四平八穩話，行會成員必須恪守集體負責制及保密制原則。咁係咪如田少所講，如果幾位唱反調嘅行會成員不撤回言論，就應該自行請辭呢？金刀梁就話：「無乜留意佢哋講乜，聽吓講乜先再算啦！」所以話，薑愈老愈辣真係無講錯。
雖然金刀梁愈老愈辣，但腰骨就隨着年紀愈來愈硬。我哋尋日報道金刀梁以安老事務委員會主席身份出席活動嘅時候，被安排做一項「坐地前伸」腰骨柔韌度檢查，發現佢條腰骨好硬，金刀梁尋日諗番起都認老話：「大佬，一早就知道做呢項檢查一定唔掂，七十幾歲人喇，想我點吖！」睇嚟活動主辦機構認真大整蠱囉。