一場金融海嘯，好多香港股民做晒大閘蟹，至今猶有餘悸，其實喺股海駭浪中吃過苦頭嘅，又點止小股民。縱橫商界幾十年嘅「青樓名妓」張永霖尋日剖白股壇苦旅嘅痛苦心迹，話自己「喺金融界打滾四十年，結果得個吉」，奉勸各位年輕人都係勤勤懇懇儲錢，伺機買磚頭實際得多。
張永霖當年自嘲係「青樓名妓」，但令佢最覺悔不當初嘅，並非當初誤墮紅塵嘅商界迎送生涯，反而係表面風光嘅金融界戰績。張永霖尋日去樹仁大學新聞系演講，主講題目係「教育工作同社會責任」，不過最吸引嘅部分，係「青樓名妓」對股海浮沉嘅反思。
張永霖奉勸在座學生，投資最好買樓，唔好玩股票，佢就係人辦，喺金融界打滾四十年，結果得個吉！「青樓名妓」仲苦口婆心咁叫大家小心，千祈咪以為投資市場可以改善生活，投資市場係有錢人嘅玩意，唔止啲大鱷會興波作浪，連政府都喺度上下其手，所以，佢叫各位年輕人，都係畀心機儲錢買樓啦，當樓價調整至啱水位，不妨入市當投資；當然，依家樓價高到離譜，張永霖話梗唔係適當時候啦！「青樓名妓」呢段心迹，真係句句瀝血，聽者心酸，各位股民好好咀嚼。