豪宅創天價，恒基主席李兆基聲言內地人貴貴都買得起，但始終有人覺得樓價太貴，好似行政會議成員張建東日前就慨嘆豪宅呎價貴到離晒譜，擔心會形成樓市泡沫，估唔到呢番言論連有做地產嘅合和實業主席胡應湘（哥頓）都有同感，仲開聲叫政府壓抑豪宅樓價添！
哥頓講嘢向來直腸直肚，有嗰句講嗰句，尋日我哋遇到佢去香港會食晏，於是問佢會否支持復建居屋？雖然哥頓話呢個問題仲要研究，暫不評論，但佢就提醒政府要做兩項重要工作，包括壓抑豪宅樓價，勿再放任繼續飆升，否則升得太高會形成泡沫；其次係透過政策協助市民「上車」首次置業。
雖然哥頓講出好多打工仔嘅心聲，但政府講明無意干預樓市，又唔贊成復建居屋，哥頓嘅建議豈不是變得好高難度？哥頓話：「一啲都唔高難度，睇吓有無心做嘅啫！」哥頓說話真係一矢中的，可惜政府故步自封，被九七年樓市大跌嚇窒咗，莫非打工仔真係要認命聽煲呔曾話去偏遠地區買樓？