今時今日，成功女人除咗要識搵錢，仲要識得為私房錢增值。早幾日卓妮放假行街，點知撞到專業會議立法會議員梁美芬喺中環嘅金舖入面shop得起勁。着咗件黃色中褸嘅梁美芬，襯埋個紫色clutch，佢喺金舖入面行來行去，又出門口喺擺滿黃金嘅櫥窗度左揀右揀，一男一女店員好好服務咁跟出跟入，有專人服侍嘅梁美芬揀咗差唔多成個鐘，先埋單攞住袋金走人。
唔知係咪買得投入得滯，平時一眼關七嘅梁美芬出到門口先見到卓妮，搞到佢都有啲愕然，不過佢都不忘同卓妮打招呼。有鋪儲金癮嘅梁美芬，仲答應畀啲珍藏卓妮睇。
每月出糧買金幣儲錢
所謂「打鐵要趁熱」，尋日卓妮就去咗睇梁美芬嘅「小金庫」。咪睇佢係現代事業女性，投資方面佢好傳統，只對實物感興趣︰「我太爺、爺爺鍾意儲銀，佢留咗好多錢幣、銀器畀我哋，可能受佢哋影響，我都想第日將我儲嘅嘢同我啲子子孫孫分享，一代傳一代。」因為呢個情意結，梁美芬第一份糧買咗隻鑽石戒指送畀媽咪之後，剩番嘅錢就用嚟買佢人生第一個楓葉金幣，之後每個月出糧都會買一個金幣當儲錢。
黃金升值好過買雷曼
「我對黃金情有獨鍾，雖然我都鍾意買手袋同鞋，但與其買消費品，點解唔買自己鍾意得嚟又可以保值嘅嘢呢？初初啲朋友都笑我鍾意儲金係婆仔，但我覺得黃金最有安全感，經得起歷史變化。」好似從政咁，梁美芬講投資都係直話直說，佢話金幣、金錢、金錠和金條統統都係佢心頭好，依家金價升到過每両萬一蚊，梁美芬嘅金庫升值三、四倍，所以佢都好滿意：「女人一定要有自己儲錢升值嘅能力，同埋要穩陣投資；煲呔曾又唔係我親戚，買金好過買雷曼啦！」諗唔到梁美芬臨尾都要幽煲呔曾一默！
卓妮