經濟動力三位核心，即係Jeffrey、Sophie同梁君彥（Andrew）去年十月退出自由黨，今年六月再成功拉攏「新界王」劉皇發，自立門戶，大有鴻鵠之志，有意搶佔立法會超級保皇黨地位，絕對唔出奇。建制派喺施政報告發表當日，即暑假復會後首天召開第二次富貴飯盒會，據聞就係由Sophie掏腰包畀錢，事前Sophie更以主人家姿態落力call議員出席，雖則話大家同意輪流科水啫，不過，民記做完第一次東，接力嘅唔係「大搞手」詹培忠、五散人林大輝、專業會議石禮謙或者中總代表黃宜弘，而係新組織經濟動力嘅Sophie，呢個姿態頗堪玩味。

經濟動力喺建制派武林大會做完東宴客，兩日後隨即再有動作，神神秘秘邀約個別獨立議員見面，唔知有乜大事商討。我哋打電話畀五散人嘅I.T.豪，證實收過經濟動力邀請，但係佢哋五個咁啱當日約咗公務員事務局局長俞宗怡，討論高級公務員減薪五點三八問題，所以無法出席經濟動力嘅約會。經濟動力食咗五散人嘅檸檬，人腳即刻少咗五件，據悉，當日嘅神秘約會亦因人少而取消，究竟當日經濟動力召集各人所為何事，亦隨之成謎。

目的為弱勢政府護航

經濟動力約獨立議員傾偈，不過經過挑選，金勞詹同黃宜弘都話，無收到經濟動力嘅邀請，即係話，經濟動力對形象專業同啱嘴形嘅獨立議員情有獨鍾。有建制派議員分析，經濟動力約晤「心儀」議員，可能想傾談最低工資或者公務員減薪問題，尋求共識，經濟動力咁做，目的只係一個，就係匯聚力量，為政府嘅爭議性政策護航，經濟動力嘅核心全部來自功能組別，唔使擔心直選選票問題，由佢哋出手幫弱勢政府，合適過民記或者工聯會啦，只係政治生態錯綜複雜，要成為超級保皇黨，比喺自由黨之外另起爐灶困難得多。