自嘲有資格攞「長者卡」嘅安老事務委員會主席梁智鴻，尋日出席紅十字會為老人家舉辦嘅嘉年華時，被邀請試吓嘉年華專為老人家搞嘅身體檢查，其中一個腰骨柔韌度檢查認真攞命，要梁智鴻做「坐地前伸」，伸直晒對腳坐喺地下，雙手前伸試吓掂到幾遠，結果佢連把尺都掂唔到！
其實呢個「坐地前伸」檢查相信不少中小學生上體育堂都要做，喺地下放個有厘米尺嘅木箱，測柔韌度嘅人就要伸直晒對腳坐喺木箱前，對腳頂住個木箱，然後將雙手伸前，試吓最遠可以掂到幾多厘米。小朋友就話無難度，但對年屆七十嘅梁智鴻嚟講，難度就大啲，事關年紀有番咁上下，腰骨唔硬就奇怪，所以佢伸到盡晒都係啱啱好掂到個木箱邊緣，要掂到把厘米尺仲差一大截，簡直攞佢命！難得佢唔怕醜，畀人舞來舞去都無所謂，仲話「坐地前伸」一啲都唔辛苦，只係對自己柔韌度咁差好慚愧，認真唔話得！
除咗做「坐地前伸」，佢又要着圍裙戴膠手套幫紅十字會打手印留念，搞到件西裝污糟晒都話「無所謂」、「唔介意」，呢位「梁伯伯」認真Nice！