立法會行政管理委員會啱啱發表嘅年報顯示，經歷過金融海嘯洗禮後，今年立法會嘅投資收入雖然比起去年近八百八十三萬元差咗少少，但都有七百幾萬元，似乎無畀金融海嘯淹沒，而且仲有一百零四萬元嘅其他收入，計埋政府近四億元撥款，立法會嘅收入有四億零七百幾萬元，比去年有增無減。須知道Pauline嘅投資心得都係信奉穩健，由佢睇實立法會點用公帑，納稅人都無咁擔心啦！

開支跳升至四億

雖然新一屆立法會都使咗唔少錢，一來今屆立法會開始，六十位議員除咗加人工之外，仲多咗份醫療保險，二來兩度出動「尚方寶劍」《立法會（權力及特權）條例》查雷曼同梁展文事件，令到立法會多咗開支，僅用紙量就五年嚟首次上升，加加埋埋立法會總開支由○八年接近三點六億元，跳升至今年四億零三萬元，持家都唔容易。

不過幸好收入方面頂得住。截至今年三月底，立法會都有四百七十幾萬元盈餘，即使比起去年八百四十六萬多元盈餘少咗一截，但有得賺都算相當唔錯㗎喇！至於營運儲備方面，去年前立法會主席范徐麗泰退下火線嘅時候，有一億四千二百四十萬元，最新儲備則輕微上升至一億四千四百萬元。特區政府成日將審慎理財掛喺嘴邊，好心就認真學吓立法會先再講啦！