乜傢伙世界冠軍呢？即係咁，美國《商業周刊》引述聯合國開發組織嘅報告指出，香港係全球已發展經濟體系之中，貧富懸殊最嚴重。用以反映貧富差距嘅堅尼指數，香港達到四十三點四，排第二位嘅新加坡係四十二點五，排第三位嘅美國係四十點八。所謂堅尼指數，零表示絕對公平，一百表示絕對懸殊，指數愈高即係貧富差距愈大。香港最富有嘅一成人，收入係最貧窮一成人嘅十八倍。

報告指出，由於香港擁有大量富豪，但係工人並無最低工資保障，令到貧富差距拉闊。報告又話，香港有超過一半人口居住於貧窮嘅公共屋邨。另外，根據美國《福布斯》雜誌，香港有十九個億萬美元富豪，新加坡只有兩個。

香港富豪多，本來都唔係乜嘢大問題，有錢齊齊搵啫，慘則慘在香港窮人更加多。香港社會服務聯會早前公布數字顯示，全港有一百二十三萬人生活於貧窮家庭。呢個貧窮人口，未必係世界冠軍，始終係香港紀錄，百歲人瑞一世未見過。

已發展經濟體系之中，一定會有貧富差距，冇可能完全公平，只有共產主義大鑊飯先至有做又三十六、唔做又三十六嘅均富假象。之所以話係假象，因為均富其實係均貧。不過咁喎，貧富差距唔好咁嚴重得唔得？畀個機會窮人脫貧好唔好？

以前老一輩教落，嗱，阿仔，乖呀，努力讀書啦，讀完書就賺到錢㗎喇，書中自有黃金屋吖嘛。呢支歌仔最近似乎有少少荒腔走板，事關好多大學生都搵唔到食，一畢業就話失業，而且孭住成身債，債主係借錢畀你讀書嘅政府。既然係咁，自稱「民心我心」嘅曾蔭權，係咪應該絞盡腦汁扶貧呀？係咪應該出盡渾身解數去縮窄貧富差距呀？唔好意思，最新一份施政報告對於照顧貧苦大眾隻字不提，完全冇措施幫助低收入人士，淨係畫餅充飢拋出唔知幾時可以實現嘅六大產業。換言之，曾蔭權懶理窮人死活。

哈，有議員連番炮轟煲呔曾漠視貧富懸殊，你估佢有乜回應吖嗱？佢話喎，如果推出長期措施幫助低收入人士，可能會導致加稅。嘩嘩嘩！出到「扶貧要加稅」呢一招嚇鬼，可想而知呢個有閒錢為公務員逆市加薪嘅「政治家」係幾咁鐵石心腸。

係呀，政府為身在福中不知福嘅公務員派糖就游刃有餘，為一百二十三萬窮人做少少事就無能為力，功夫茶贈你兩個字：涼薄！

諗諗下，貧富懸殊稱王嘅香港，應該仲有資格問鼎另一項世界紀錄。假如有人舉辦定力比賽，項目分為「坐懷不亂」、「處變不驚」以及「見死不救」之類，香港選手曾蔭權如無意外可以喺「見死不救」一項稱霸全球！