星期日跑馬地馬主廂房一餐冇主角嘅豪門宴，代表總商會嘅立法會議員林健鋒（Jeffrey）都係座上客，係立法會議員中極少數嘅「曾朋友」之一，不過姑勿論佢係咪因為同煲呔曾係好朋友，煲呔曾至委任佢做盛事基金評審委員會主席，尋日盛事基金首輪申請結果記者會，Jeffrey首度登場果然做足功課，好明顯係讀熟書先上陣。
記者會上，大家都關心點解成功申請獲得基金資助嘅項目唔夠國際化，又唔夠盛大，Jeffrey好淡定咁話，唔想太國際化係刻意嘅，因為唔想只係資助國際性項目，希望透過基金資助本地嘅活動。記者又問，有大財團申請成功，唔係幾好喎，佢話唔係資助大財團，係資助樂團啫。
立法會新一年度工作啱啱拉開序幕，經濟動力已經好活躍，行會方面有發叔劉皇發搏到盡，幫政府打高鐵呢場仗。立法會方面，梁君彥日前又代北上打工仔同商人揚聲，要求港府向內地反映修改逗留一百八十三日就要雙重徵稅嘅規定。Jeffrey去年拍住梁君彥、梁劉柔芬同自由黨分道揚鑣自立門戶，定位舉步維艱，一年過去，佢哋應該明白咗，唔做實事，就係死路一條！