立法會啱啱開展新一年度工作，仲決定跟進甘乃威事件，遲啲好可能又多個專責委員會，依家立法會已有雷曼同梁展文兩個使用特權法委員會，連立會行管會帳目都顯示，專責委員會工作令立會環保成績表見紅，因為燈油火蠟紙都用多咗，再計埋律師費、秘書處等開支就更攞命。
根據行管會最新帳目顯示，截至今年三月底，立會開支較去年增加一成二，其中一般開支加咗一成半，立法會雖然推行環保措施多時，但上年度用紙量卻加咗一成八，信封用量更加倍增百分之一百一十三，係近五年來首次上升。
點解議會忽然唔環保呢？罪魁禍首就係雷曼迷債同梁展文事件兩項專責調查，累立法會做咗樹木殺手，因為兩個委員會都可引用《立法會（權力及特權）條例》，形同法庭審訊，委員會涉及嘅所有資料文件都要印晒畀被傳召嘅證人參考，當中唔少係機密文件，要用信封小心袋好，自然令紙張同信封用量激增，所以兩個委員會主席何鍾泰同李鳳英想慳啲都唔得。
其實呢個數只係反映三月尾之前嘅情況，家吓梁展文事件嘅調查近尾聲，雷曼事件調查亦會喺本年度內查完，但立法會事先張揚或加多個甘乃威事件調查，睇嚟立法會想慳家真係難啦！