不過，出名長氣嘅勞工及福利局局長張建宗，就點都要死撐話施政報告有協助打工仔嘅措施，佢尋日喺立法會人力事務委員會介紹有關政策時，一開波就叫議員唔好睇小短短一段嘅幾行字，其實包含咗四個重要措施，更加用咗一啲「跳出框框」嘅做法。

何謂跳出框框呢？咪就係加開一個零售業招聘中心、利用手機短訊發招聘資訊、借搵工易終端機畀非政府機構，同埋喺天水圍開設一站式就業培訓中心，全部都係新瓶舊酒嘅措施，但最佩服就係張局長把口「朗過油」，講到呢啲新橋入面有好多新思維，仲係由個局同兩個部門一齊集思廣益出嚟嘅創意，叫大家千祈唔好低估呢項創意。

其實，得嗰幾行字可以搞到咩花臣呀，難為張局長要硬銷施政報告有料到，化腐朽為神奇。