香港中華總商會會長蔡冠深呢排相當忙碌，早幾日喺山東睇全運會開幕返嚟，一落機就要趕去皇朝會出席全國政協副主席鄭萬通嘅訪港飯局，尋日又要忙中總嘅十‧一特刊發布會，跟住又匆匆忙忙趕去睇會址嘅裝修進度。
無論幾忙都好，蔡會長對好多時事新聞都有留意，尤其是做廠出身嘅佢，對於工廈依家可以改變用途嘅新聞都好留意，不過佢就申報利益，話自己無擁有工廈，亦無意買入，因為覺得要搞工廈改裝好複雜，但呢個政策佢就覺得唔錯，一來唔使浪費資源，二來在商言商，工廈業主改用途賺錢唔係壞事，事關佢哋都守咗好耐，又要花錢翻新，所以即使賺錢都係應該，蔡會長答得認真面面俱圓。
講番全運會個開幕式，蔡會長話今次係跟中總考察團去睇，成個團有成30人，好熱鬧。佢話雖然全運會比唔上奧運會嘅開幕，不過相當好睇，尤其是其中一Part有一個好似大碗咁嘅背投幕牆，將泰山移到眼前，令佢印象最深刻，覺得依家國家科技好犀利，單單一個山東省都可以將開幕式搞得咁有聲有色，證明國家有人力又有財力！