平叔尋日同太太十指緊扣出席新書發布會，心情勁靚，好友紛紛到賀，曾在政界打滾多年嘅前立法會主席黃宏發，就帶備兩支九九年嘅智利紅酒到場同平叔㗳番杯。平叔搞得新書發布會，當然唔只介紹新書咁簡單啦，除咗借機會評論尋日政府最新委任嘅兩名副局長外，仲大法官上身，狠批煲呔曾施政報告提出嘅慳電膽現金券計劃，有違香港法治精神喎，事關至今沒有一條法例容許兩間電力公司因為派發慳電膽現金券而要加價補貼，利潤管制計劃亦不應該有咁嘅明文規定。

論政三大原則

平叔過去曾就多項社會大眾關心嘅政策及議題開聲，其中批評煲呔曾就比較頻密，好似去年初寸煲呔曾爭位傳送奧運火炬，又寸煲呔曾嘅「民望如浮雲」言論變幻莫測，今年初更加暗寸政務官（ＡＯ）出身嘅煲呔曾自高自大，慨嘆精英決策主觀誤事。雖然平叔鬧得咁狠，但他強調自己論政有三大原則，就係以事實為基礎、不透露政府機密及不冒犯別人，總之唔係亂咁發炮咁喇。

正所謂「言者無心，聽者有意」，分分鐘得罪人都唔知。平叔坦言，就算係咁都無辦法，因為自己都係憑良心去寫文同論政，對事不對人，並非惡意攻擊，就算評論對象有乜感受，實在亦好難控制喎！不過，事實上「有幸」被平叔選為批判嘅對象，相信都係「出爐鐵」唔揼唔得，煲呔曾就係一個好例子。

論政除咗三大原則外，平叔話文章都重要，他自誇自己嘅文章寫得唔錯，好通順，但都有段艱辛過程。自稱讀番書嘅平叔話，初初開始寫作中文感到有難度，加上唔識中文打字，要爬格仔度日，所以一次過寫咁多字唔係好習慣，但寫寫吓習慣咗就好啲。平叔自嘲一把年紀無乜動力學習中文打字，加上大家又遷就佢手寫稿，所以到現在都未學識中文打字。