肥胡太監升丞相

唔講唔知，華仁戲劇社嘅英文粵劇原來有成六十幾年歷史，不過就唔係年年搞，對上嗰次係07年，今年演嘅係以戰國為背景嘅曲目，一如既往，演員都係搵番華仁仔或者華仁家眷充任。不過皇帝呢個角色呢，多年嚟都係由華仁戲劇社主席、英語粵劇創始人、身兼翻譯兼導演嘅退休高官黃星華哥哥黃展華擔任，但今年就首次改由一「出道」就做大官嘅劇社台柱陳祖澤（John）「升呢」撈埋，由高官做到皇帝，John都算巴閉。

穿着粵劇戲服嘅「華仁仔」梁家傑（右），劇中做手與參選特首辯論時差不多。	胡應湘（左一）與胡文新（右二）兩父子為胡郭秀萍嘅演出打氣，當然少不了華仁嘅狄恒神父（左二）及校長譚兆炳啦。	華仁舊生左起：伍步光、胡定旭及周湛燊在後台合照。 （徐家浩攝）

為華仁籌得400萬

其實個個華仁仔嘅角色都係由低做起，好似負責主禮嘅教育局局長孫明揚都係華仁仔，佢都係由小兵做起，至於肥胡就由「大勢已去」嘅小太監開始做起，今日一樣可以「班師回朝」做丞相，連佢自己都搞笑話醫學昌明冇有怕。講真，大家嘅目標都係要幫學校籌多啲善款，所以都唔會計較做咩角色。除咗舊生之外，華仁家眷亦都好支持，好似胡郭秀萍咁，佢老公胡應湘（哥頓）同仔仔胡文新都係華仁優良出品，雖然佢唔係粵曲發燒友，但一樣好支持，有老婆幫手嘅哥頓就話自己一定唔會粉墨登場，怕開聲會趕客，都係捐錢最實際。有人出錢、有人出力，唔怪得輕輕易易籌到四百萬啦！

卓妮