本文重點
世界建築原材料價格不斷上漲，鄉議局沙田石門新大樓造價亦上漲到一億五千萬元，聽講仲不斷加緊，變咗建造善款籌極都未到位。商界大孖沙及慈善團體已經陸續慷慨地科水，局方尋日再宣布收到信和置業主席黃志祥捐出一百萬元，至今共籌得逾七千萬元，但加埋本地及海外鄉紳捐款都仲係未夠數。
或搵地產商加碼
聽聞鄉議局主席劉皇發已諗定應急方案，首先會游說未捐錢嘅地產商慷慨解囊，如果最後仲未籌夠數，就會懇求個別已捐錢嘅地產商再加碼，按目前股市和樓市嘅上升走勢，相信加碼都可以得心應手。
局方早排已為大額捐款人或機構制訂一套以設施命名嘅鳴謝方案，睇番啲設施名單，同樣寸金尺土，最貴嘅中庭命名值一千萬元，捐五百萬就可獲行政辦公室及走廊等命名，好似黃志祥咁，佢捐一百萬元，就只得一個選擇，就係大樓露台，露台唔多開揚，事關對正中華電力嘅沙田中心；當然最終捐幾多，都係要睇善長仁翁肯唔肯慷慨解囊。