究竟邊位術數師傅咁猛料呢？就係香港術數家協會術數師傅楊子東，佢前年已測中鼠年會發生好多嚴重交通意外及與土有關嘅傷亡，又推算到牛年「七煞」特別旺，四、五月會遇到市民上街抗議，特別係保安局會最容易出事，結果多個紀律部隊為爭取加薪輪住上街抗議，連維持治安嘅警察都幾乎上街，衝擊政府管治威信，好彩最後㩒得住。

不過，楊師傅測得最準嘅都係煲呔曾運勢，佢只係算過煲呔曾嘅出生年月日，就已算到煲呔曾喺農曆九月行衰運，因為煲呔曾最忌火、土，而九月係「甲戍月」，「戍」係「火庫」，己丑年五行立陰係「霹靂火」，煲呔曾八字簡直係沖到七彩，結果就爆出慳電膽益親家醜聞。有人會問，本月十八日才是農曆九月初一喎？楊師傅話，本月八日「寒露」已開始踏入農曆九月，一星期後施政報告發表翌日，無花無假。

下個月有替死鬼？

究竟煲呔曾呢股衰運往後點發展呢？楊師傅話，農曆十月「乙亥月」，可能會有人幫煲呔曾孭鑊頂一頂，叫做化解咗少少，但呢股衰運繼續纏身，事關到農曆十一月「丙子月」及十二月「丁丑月」都有「火」，依然沖着煲呔曾，一直衰到庚寅年，即到明年新曆二月四日立春之時，股黑氣才會消散，之後嘅運勢就要明年初再算過嘞！

雖然楊師傅算高官運程咁準，但佢算牛年股市同樓市就唔多準嘞，當時佢話中小型住宅及豪宅樓價會大幅下挫，股市會低見七千五百點，但實際上呢大半年股市同樓市都穩步上升，但牛年一日未過，都唔知最終準唔準，當然呢方面無人望佢準啦！