同樣嘞，今屆諾貝爾三個化學獎得主有幾叻，功夫茶照例又係一頭霧水，淨係知道佢哋嘅研究對於製造抗生素有幫助，可以減輕病痛同埋拯救生命。

抗生素其實係乜東東呢？唔好玩啦，都話唔係科學家咯，鬼知咩！之不過咁，有一個普通常識應該好多人都知，就係如果濫用抗生素，會令到病菌產生抗藥性，久而久之，無藥可醫。

人類固然唔應該濫用抗生素，動物呢？其實一樣唔應該濫用，尤其係食用動物，例如雞雞鴨鴨豬牛羊魚蝦蟹。你知啦，英文有一句講法係話：You Are What You Eat。萬一食用動物濫用抗生素，佢哋體內含有抗藥惡菌，你將佢哋食落肚，即係惡菌自動轉帳，你隨時都會中招。

事實上，香港大學首次有研究分析五十四個含抗藥基因嘅人類及食用動物大腸桿菌樣本，發現有九成樣本嘅抗藥基因完全相同，證實人類經飲食而感染抗藥惡菌，而且瀕臨無藥可醫嘅地步。

港大感染及傳染病中心總監何栢良就話嘞：「證明咗抗藥基因已經喺人類同動物之間散播，食用動物成為咗人類感染惡菌嘅重要源頭。」

另外又有研究抽驗本港雞隻同埋豬隻，發現分別有八成八以及七成含抗藥性大腸桿菌，顯示惡菌肆虐動物嘅問題嚴重。

簡單咁講，本地以及內地農場對食用動物濫用抗生素，搞到佢哋體內含有天不怕、地不怕嘅超級惡菌，然後經過一輪煎炒煮炸甚至刺身生食，食家成為另一個帶菌者。食家一個中招，一個唔好彩又染埋身邊嘅人，人類之間互相傳播，你都咪話唔得人驚！

既然係咁，係咪應該好好監管農場，唔准佢哋濫用抗生素呀？理論上梗係應該啦，何栢良係咁講嘅，政府有責任設立監察機制，要求中港兩地農場呈報使用抗生素嘅情況，或者列作本地農場嘅續牌條件。何總監又批評，現時為豬隻驗尿嘅做法已經過時，因為「屠宰前兩日唔食藥已可過關」，促請當局盡快展開監察工作。

吖，唔知點解呢，功夫茶有一個不祥預感喎，特區官僚係唔會理會何栢良呢一番金石良言嘅，尤其係食衞局局長周一嶽，更加係睬你都傻。點解會有呢個預感？哦，好簡單啫，一來，特區官僚出晒名「少做少錯、不做不錯」。二來，你叫呢班官僚監管本地農場已經難過登天，你叫佢哋過問內地農場？當然冇膽井水犯河水啦。三來咯喎，周一嶽忙到踢晒腳一頭煙，補鑊補到周身唔得閒，唔係呢間醫院出錯就係嗰間醫院死人，邊有時間理得你雞雞鴨鴨豬牛羊魚蝦蟹有冇濫用抗生素啫！

計功夫茶話齋，話之你惡菌係咪自動轉帳啦，周周孭一鑊嘅周一嶽已經練咗一套自動縮骨術，見一鑊縮一鑊！