早前因為突發性心臟病發要「通波仔」嘅財政司司長曾俊華（鬍鬚曾）復咗工六日，好多作息回復正常，仲繼續更新網誌。尋日新增嘅網誌就講番佢喺美國匹茲堡開二十國集團金融峰會（G20）嘅點滴，佢同國家領導人喺酒店住埋同一層樓，都煞有介事咁同大家報告一下。
鬍鬚曾特別提到，喺匹茲堡嘅酒店，自己同幾位國家領導人住埋同一層，就連食飯方面都有專人照顧，幫佢哋安排中國菜，話佢同一班領導人食得好開心添。
其實鬍鬚曾都唔係第一次公開表示自己能夠同國家領導人享有同樣嘅待遇，上年開G20峰會時都已經寫過，點知佢今次又好有興趣再講一次。
除咗大晒同領導人「同呢」，佢又大晒自己好飛得，佢舉例話，幾年前香港搞世貿部長級會議，佢以大會主席身份不停周圍飛去拜訪唔同國家嘅領導，一年有三分二時間唔喺香港。佢要證明自己急性心臟病發作唔係因為飛得多，因為佢好習慣周圍飛，仲以「僕僕風塵」形容自己，講到自己偉人一樣。