本文重點
雲集政商界名人嘅華仁戲劇社，呢個月尾踏上演藝學院台板上演一場英文大戲。舊生兼馬會主席陳祖澤（John）擔大旗飾演主角外，就連非華仁舊生嘅合和主席胡應湘（哥頓）夫人胡郭秀萍亦粉墨登場，胡太笑言，老公及囝囝胡文新都係華仁舊生，可惜兩父子怕醜到極，逼住佢出嚟獻醜喎。
陳祖澤六成飽上台
齣英文大戲《鴉雀如何作鳳凰》本月廿二至廿三日上演，不過一眾演員已秘密練兵半年，尋日John、胡太、公文袋梁家傑等人齊集華仁禮堂排演，請嚟樂師大鑼大鼓配樂，胡太邊唱邊拂吓水袖，功架十足，佢自爆只向粵劇大老倌謝雪心偷過幾次師，但為咗慈善，過去亦曾數次參與華仁英文大戲演出。胡太今次飾演春秋戰國時代嘅越國公主，同飾演吳王嘅John有唔少對手戲。
講起演出心得，John話，出台前只食六成飽，否則運唔到丹田氣，胡太就話要少講嘢養神同養聲。賭王何鴻燊去年亦有參與華仁嘅大戲表演，不過今年抱恙，未知會否到場睇表演。
華仁今年慶祝活動一浪接一浪，除咗上演大戲為學校改善工程「撲水」外，今年亦係香港華仁九十周年及「九華」八十五周年誌慶。該校計劃喺本月十八日舉行校慶步行籌款，請嚟星級舊生包括教育局局長孫明揚、醫管局主席胡定旭、太古（中國）主席陳南祿等人撐場，接住再喺十二月十三日於會展舉行校慶感恩晚宴，當日遇着東亞運閉幕禮，大會擔心有嘉賓未必可以聲音兩邊走。
