馬逢國前幾日出席中國電影展開幕禮時講開政府削資助嘅話題，佢話政府停發額外資助唔算「過橋抽板」，因為政府當年撥出四千萬元係一次性嘅兩年資助，並唔係永久政策，所以唔可以視之為削減資源，就佢所知，政府一直都冇減過對九大藝團嘅資助喎。

作為藝發局主席，馬逢國話當然希望政府可以增加對藝術界嘅資助，不過與其等政府科水，倒不如靠自己仲穩陣。佢話：「自立能力愈強，依賴性愈低」，而事實上亦有藝團唔攞政府資助都可以生存。佢建議，長遠計政府應協助藝團大搞產業化，吸引更多市民買飛入場。

政府過橋抽板削撥款

不過，馬逢國一番「肺腑之言」胡恩威就唔多啱聽，佢憤言：「佢（馬逢國）咁講嘢好唔負責任啫！」之後仲將對方嘅觀點逐一擊破。有關削撥款問題，胡恩威話政府當年撥款前講到明兩年後進行檢討，而且仲會投放更多嘅資源支持藝術發展，點知依家個檢討冇咗蹤影，但資源就照cut，結果搞到藝團大失預算，以進念為例，如果政府終止額外資助就要裁減一半員工先維到皮。

胡恩威又話：「我哋都係專業人士，藝術同醫療、教育一樣，理應得到政府補貼！」講到搞產業化，胡恩威即時將個矛頭對正政府，佢怒斥政府一直冇做好藝術教育工作，搞到社會上冇乜人識欣賞藝術，藝團又何來觀眾？佢仲反諷，藝團如果唔靠政府補貼，唯一嘅出路係「管弦樂團日日拉流行曲，劇團就去做模騷。」

原來佢哋兩個人係有共同方向嘅喎，就係由政府做好藝術教育工作，到咗藝團有市民捧場，就可以搞產業化嘞。即係話，講到尾都係政府做得唔夠喇。