沙田馬場尋日舉行一年一度「莎莎婦女銀袋日」，唔少入場嘅女士都悉心打扮，仲戴埋英國傳統服嘅指定配飾禮帽入場。主辦單位喺馬場一樓開咗個禮帽展櫃，等女士可以即買即戴，卓妮揀帽時仲撞到港交所主席夏佳理（Ron）陪太太夏安麗試帽。
碌錯卡現金又不足
夏太尋日左揀右揀，終於睇中兩頂分別為淺藍色同紫色嘅禮帽，但款式最普通嘅禮帽都要成千六蚊先有交易，而且平日又冇乜機會戴出街，搞到夏太睇到個價錢牌之後都有所猶豫。不過，出名係好好先生嘅阿Ron為博紅顏一笑，即時好識做咁講：「係咪鍾意呀？係就買啦。」之後仲拿拿臨去櫃枱找數。
阿Ron攞張美國運通銀行黑卡出嚟埋單，點知收銀嘅職員揸住張卡諗咗陣之後，竟然尷尷尬尬畀番張卡阿Ron，仲話佢哋只收Visa、Master或者現金。呢位前馬會主席聽到，當堂面都黑埋，因為佢當下冇咁多現金，加上佢隻馬「超班」仲有幾分鐘就出賽，如果再同個職員糾纏落去，好可能會錯過賽事。夏太見狀即時打圓場，話自己唔要頂禮帽，仲拉住老公去為「超班」打氣，不過隻馬仔唔爭氣，最後三甲不入。
近排金價屢創新高，卓妮趁機請教阿Ron應唔應該買金，佢話與其買金倒不如買金礦股喎，作為港交所主席，佢幾時都不忘為港交所服務，不過佢就唔肯透露自己有冇買番幾手金礦股。
梁太唔夠高戴禮帽
除咗夏佳理伉儷之外，尋日仲有好多名人成雙成對現身馬場，好似主人家莎莎國際控股集團主席暨行政總裁郭少明夫婦、恒生首位女大班梁高美懿伉儷、全國政協委員施子清夫婦等。三位太太當中，只得梁太冇響應戴禮帽，佢自嘲話：「我唔夠高吖嘛。」不過梁生就護花心切為太太解釋：「其實我太太係唔適合花枝招展，佢唔係唔夠高。」老公咁識講說話，氹到恒生一姐笑不攏嘴。
卓妮