十八區好多區都唔肯接收厭惡性設施，政府近年積極向偏遠嘅屯門及離島區埋手，計劃興建污泥焚化爐，屯門居民狠批政府當正該區係厭惡性設施集中地。環境局局長邱騰華為說服居民，講到環保焚化爐天花龍鳳，呢幾日仲半賣半送安排Jetso團邀請兩區區議員到日本考察。
一行廿六名區議員尋日已抵達東京展開四日考察行程，先後到東京及大阪市考察當地先進又美觀嘅焚化爐設施，屯門區議會主席劉皇發都畀面撐場，而邱騰華明早上午就會匯合考察團，一齊參觀東京新江東清掃工場。四日三夜考察團，政府都係一口價收每位區議員三千幾元啫，其他飲食及交通費就由政府包底。
過咗暑假淡季，三千三百元四日三夜機票連酒店套票都勉強做到，但現在日圓紙水咁高，一日三餐都幾貴吓，斷估邱騰華唔會安排區議員去食拉麵啩？至於交通，東京市內安排旅遊巴都係有限錢，但最後一天由東京去大阪考察，搭日本JR要成一千元，所以加加埋埋政府肯定半賣半送。至於呢個團能否促成議員接受焚化爐，就要拭目以待嘞。