颱風「巨爵」尋日吹襲本港，但無阻港人做善事。香港大學醫學院尋日傍晚六時本來打算為感染及傳染病中心舉行命名典禮，咁啱天文台喺同一時間改掛八號風球，仲要事先張揚嗰隻，結果記者會取消咗，但校方堅持舉行命名禮，原來校友兼腎科權威余宇康教授同佢太太雷覺雲、即係九巴創辦人雷瑞德嘅女兒，合共捐出五千萬元畀呢個中心做傳染病研究，並以余太姓名命名，所以大家都無懼颱風，一切如常進行。
今次港大得此捐款，其實港大微生物學系主任、人稱「醫學神探」嘅袁國勇居功至偉，事關佢早前親自診治余宇康嘅親人，令余宇康感受到控制同研究傳染病嘅重要性，所以決定出錢又出力，推動本港醫學界發展，貢獻社會。
有份出席命名典禮嘅中心總監何栢良話，好開心收到呢大筆善款，希望日後用嚟加強醫院同私家醫生對控制傳染病嘅培訓；佢又計劃為中心添置最新嘅化驗技術同儀器，以後即使再面對新傳染病襲擊，好似豬流感一樣，都希望可以喺最短時間做最多化驗，及早搵到疾病元兇。