政府新聞處尋日搞咗個展覽，唔少前任新聞處長都去捧場，包括馬會主席陳祖澤（John）。阿John八六年做新聞處長，雖然短短一年，但佢話呢份工好有挑戰性，佢任內經歷兩件大事：第一件係當年嘅港督尤德爵士喺北京病逝，遺體運返香港後搞嘅葬禮；第二件就係英女王最後一次嚟香港。佢話最深刻係面對英國一大班傳媒，呢班傳媒嘅要求同香港嘅媒體有啲唔同，搞到佢頭都痛埋。
阿John記得當時有個場合，本身唔可以畀太多記者入去採訪，活動由新聞處統籌，點知惹來外國傳媒不滿，要求攞好位。阿John到底點拆彈，佢笑而不答，睇佢自信嘅笑容，相信過咗關。
煲呔曾都有出席展覽，全場無發言，但中途發生咗件小插曲。喺儀式開始前，煲呔曾忽然收到個電話，現場嘈雜，大家只係聽佢叫咗兩聲「Thomas，Thomas！」之後見佢皺晒眉，仲用手遮住自己個樣，表現得好苦惱。記者本來想上前聽真啲，新聞處職員已為佢護航；之後隱約聽到煲呔講咗句「多謝晒」就收線。究竟佢同邊個Thomas傾電話呢？日前釀成六死嘅工業意外地盤發展商新鴻基地產，其副主席郭炳江正正係叫Thomas，莫非大家傾緊單意外？