中總尋日宣布九月廿七日舉行「千萬行」，為慈善團體籌款千萬元，卓妮都貢咗去。一眾中總領導層齊亮相，會長蔡冠深旗下嘅新華集團、副會長楊釗嘅旭日集團以及袁武所屬嘅招商局集團等，帶頭自揼心口，各自捐款五十萬元，喺醫院養病嘅燊哥收到蔡會長「撲水」信函後，亦爽快捐出五十萬，但尋日喺中總頒發致謝錦旗禮上，燊哥未有露面，派千金何超蕸做代表。

可以踩健身單車

卓妮追問燊哥病況，超蕸笑笑口話，爸爸喺醫院期間最愛睇電視，但前日馬季開鑼卻因為何家未有馬出，爸爸未有興致睇賽馬轉播。超蕸又話，爸爸跌傷頭後記憶力及記性未有轉差，每日均會聽女兒匯報城中八卦新聞，有時仲會踩健身單車超蕸話爸爸知道歌星劉德華自爆結咗婚，仲大表驚訝話：「吓！」但問到燊哥幾時出院，超蕸話未知住；至於燊哥月尾會否以政協常委身份上京參加「十‧一」活動，超蕸話要視乎康復進度。

左起：陳幼南、楊釗、蔡冠深、袁武及李德麟一眾中總領導層，齊齊出錢出力支持中總連串活動。 （嚴少阡攝）

八間企業各自捐五十萬贊助慈善步行，當中包括金利來太子爺曾智明（前排左一）、信德集團何超蕸（前排右一）。

中總斥資800萬裝身

今次有份捐五十萬元嘅仲有中總常務會董兼金利來太子爺曾智明（Ricky），佢透露九月初同歌星太太黎瑞恩，隨九龍社團前往革命根據地井岡山見識，今次係佢首次帶埋太太出差，不過據聞小恩子都好識做，只有食飯時至走埋老公身邊，其餘時間多數留喺酒店，唔阻住老公應酬。

講番中總今次揼千萬做慈善，原來仲有下文。中總十月一日將贊助逾四百萬元喺維港上空放煙花，仲會搞個欣賞煙花酒會，但咁啱得咁蹺，同北京「十‧一」煙花活動撞到正，中總班高層惟有京港兩地撲，朝早睇完閱兵儀式後趕返香港，主持晚上嘅煙花匯演。蔡冠深擔心，當晚城中名人上晒北京，無乜人出席酒會。

中總活動陸續有來，年尾將斥資八百萬銀為中總大廈裝身，蔡冠深話，大廈已有逾五十年歷史，係時候翻新吓大堂、大禮堂、接待廳等。

卓妮