醫療事故爆唔停，前線醫護人員做錯嘢，公眾梗係鬧爆啦，但醫管局主席胡定旭發咗封公開信，貼晒喺公立醫院大堂，佢喺公開信中打晒溫情牌，做晒好人，對於醫護人員連番失誤，佢冇責備，仲反而呵護備至咁話：「我相信大家都和我一樣，因為最近發生的一連串事件，很不開心……不要因為這一點點挫折而感到沮喪……」仲話能夠作為醫護人員嘅主席深感榮幸添。

封公開信睇起上嚟有啲骨痹，唔知醫院裏面行過睇到嘅病人點諗，就算醫護人員都未必受落，因為醫療失誤而受害嘅病人同家屬，可能更加火滾。代表醫護人員嘅立法會衞生服務界議員李國麟就直指肥胡喺度做ＰＲ（公關），例如肥胡話要完善機制，講咗咁多年，乜嘢實質嘢都冇做過。