發叔早前向本報預告，經濟動力最快明年初有望成功組黨，呢個消息成為尋日聚會嘅焦點話題，可惜嘅係，發叔無現身，無法叫佢透露最近進展，而3L就異口同聲，話無排除任何可能性，目前做好手頭工作，得到外界支持後，才諗下一步發展，又話對發展充滿信心。

永不返自由黨？

記者又追問，3L係咪唔會重返自由黨？Sophie高聲回應：「Never say never！（永不說不）」原來佢聽錯以為記者問組黨，知道原委之後，句說話即刻話收番。對於會否重返自由黨呢個問題，其實答案是否never（永不）至啱呢？

佢哋組黨未成，但喺組織上似乎有唔錯嘅進展。Jeffrey尋日宣布，經濟動力已經成立咗八個小組，分別係環保、基建及物流、會員發展、珠三角合作、中小企、旅遊、青年，以及政制與社會八大範疇，每月開會一次，各司其職，每組設有召集人。至於召集人係邊位？三、四人如何負責八個專責小組，佢哋就話「唔講畀大家聽，第日至公布」。究竟係虛擬嘅八個小組，定係有實質運作，相信大家畀啲耐性，好快就有分曉。

經濟動力組黨未成，但陸續有搞作，繼早前發起派「同心結」抗毒禍運動，又同港大、中大與科大合作，為大學生搞政經界猛人講座，頭炮情商「財金界梁朝偉」王冬勝擔綱演出，去港大演講，剖析銀行界喺金融海嘯下嘅經營環境，對有意投身金融業嘅天子門生嚟講，算幾有瞄頭。Andrew否認部署開拓青年票源，指大學生唔係佢哋嘅選民喎。呢個講法一半係事實啦，如果3L真係成功組黨，第日派人選區議會或者立法會，咁又唔係咁講法嘞。