本文重點
資訊科技界立法會議員譚偉豪日前同太太去咗日本神戶自駕遊，期間專程揸咗個幾鐘頭車，去知名漫畫家手塚治虫嘅紀念館參觀。我哋問佢係咪想去了解吓日本著名嘅動漫產業，以便協助香港嘅業界發展，佢就尷尷尬尬咁話，都有小小關係嘅，但最主要原因係佢太太好鍾意手塚治虫漫畫，尤其係細個喺電視睇過嘅卡通片《藍寶石王子》，近年仲學埋日文以便深入了解當地文化，一年閒閒地都會去日本玩兩次。
太太大唔透鍾情日本動漫，I.T.豪本身就最有興趣神戶喺大地震後嘅重建歷程，特別去咗當地嘅地震紀念館參觀。佢話神戶喺大地震後滿目瘡痍，但當地市民同政府都好積極齊心，好快就發展得仲繁榮過以前，值得同樣發生過地震嘅四川參考。
和歌山酒店勁乾淨
I.T.豪同太太又去咗當地嘅新進旅遊點和歌山玩，佢話和歌山嘅溫泉當然出名，但最令佢印象深刻嘅，反而係當地酒店嘅管理。佢話佢哋入住嗰間酒店跟足日本傳統文化，一踏入門口就嚴禁着鞋，連商場、餐廳同升降機都係咁，但行足全日，對腳板都冇污糟，衞生工作一絲不苟。
卓妮