金融海嘯見底未？呢個問題相信只有先知至答到大家，但特區政府財金官員居然話「隧道中見曙光」，金融海嘯已經過去，連金磚四國財長都無意中刮咗政府一巴，話現在斷定金融海嘯已過去言之尚早！百仁基金主席、恒基地產副主席李家傑尋日被問到同一問題，都係話「好難講呀」，仲奉勸小股民想入市都好，千祈咪借錢！
李家傑尋日現身拔萃男書院，出席電台同義務工作發展局合辦嘅活動。佢話依家全世界嘅政府都喺度救市，要睇各國政府會唔會縮，即是各國政府揼嘅錢會唔會停，先至可以從中窺探出救市救得夠未，而且唔單止睇中國政府，而係要睇全世界嘅政府。不過李家傑仲話，無論從金融市場抑或實體經濟嚟睇，「經濟數據其實未得㗎，有排㗎」！
咁金融市場同實體經濟幾時先復甦？李家傑好老實話：「估唔到喎呢樣，好難估，牽一髮動全身嘛！」如果有小股民想入市，千祈咪借錢、咪玩孖展，最好買吓藍籌股算囉。