尋日係理工大學同英國華威大學（University of Warwick）合辦嘅綜合深造工程商業管理課程畢業禮，依慣例請嚟工商界名人做主禮嘉賓，香港工業總會主席孫啟烈（Cliff）都畀面出席，仲話好多謝理大幫業界培訓人才添。
Cliff做咗工總主席之後忙咗好多，不時都要同業界溝通、搞聯誼，下個月仲會親自帶團上黃山。黃山睇日出，可以爬上去，亦可以租車上山，Cliff預計都係租車上山，但就好有信心話，即使行上去都無問題，莫非佢經常做運動？非也，只係同靈芝有關。原來Cliff九年前開始有飲靈芝沖劑習慣，每日三包，佢話靈芝雖然唔係用來醫病，但可以調理身體，令身體機能正常唔退化，咁就行乜山都無問題啦！佢仲不時向朋友推薦添。
不過坊間嘅靈芝丸，價錢一啲都唔平，唔知飲沖劑會唔會仲貴呢？Cliff擰頭話，每日三包靈芝沖劑成本只需要廿幾蚊，相當經濟實惠，大家都不妨試吓。不過Cliff話咁食法有啲後遺症，就係唔怕有膽固醇，所以食幾多山珍海味都唔怕，搞到佢成日都減唔到肥喎！Cliff又使乜怕呀，食得是福嘛！