經濟動力上周四現身中環政府總部，出席十月施政報告諮詢會，Jeffrey神采飛揚，原來佢啱啱由日本度假叉完電返港。Jeffrey同太太、兒子三人行，以自駕遊方式遊歷北海道登別、洞爺湖、小樽同札幌，Jeffrey同囝囝兩仔爺玩分工，一人揸車一日，當係享受天倫樂嘅另類方式。

Jeffrey一家三口嘅首站係登別，香港人對呢個地方應該唔會感到陌生。登別位於北海道西南部，係日本數一數二嘅溫泉勝地，其中又以地獄谷最聞名，火山氣體從灰黃色嘅岩石表面噴出，空氣瀰漫濃烈嘅硫磺異味，加上水滾沸騰起泡嘅景象，成為地獄谷名稱由來。Jeffrey話，香港天氣咁熱，起程時都有啲驚對住啲溫泉得物無所用，點知喺登別留宿當晚，氣溫驟降至十度左右，凍到佢騰騰震，對住七款溫泉，佢唔理三七二十一，全部試勻晒，Jeffrey話塊面依家真係滑咗喎。