任志剛早前喺立法會講過，佢喺任內都有悉心栽培過繼任人，可惜對方決定另謀高就，佢都冇嘢好講，但當時佢冇點名講呢個人係邊個。尋日佢接受莎姐訪問時，就首次公開證實呢位仁兄，正係下個月接佢班嘅攞命陳，因此財爺鬍鬚曾喺作出任命前問佢意見，佢亦好清楚咁話對方係合適人選。

其實政界同財經界一直有個說法，話攞命陳當年雖然名為任總嘅第一副手，但實際上被投閒置散，加上當時又唔知任總仲會做多幾多年先肯退休，所以先至決定中途跳船下海搵真銀，再兜咗個大圈投靠煲呔曾，密謀搶番任總個位。早前鬍鬚曾正式宣布委任攞命陳接班後，據聞兩人嘅交接工作亦需要一段時間，究竟係邊個嘅責任，當事人最清楚。

煲呔曾市旺就心雄？

莎姐又提到任總同煲呔曾經常就香港經濟前景唱對台，例如早前煲呔曾誇口話香港經濟可以喺年底前復甦，任總就高調警告金融海嘯可能仲有第二、第三波。任總就咁講，佢話社會有唔同意見係好事，金融市場存在好多變數，「有啲人見到個市旺就心雄」、「以為大家都係咁嘅意見就係有共識」，「將啲嘢講得太盡」，其實咁好容易會出事。任總好有自信咁話：「我最鍾意就係喺派對開到最High嘅時候，提出啲唔同嘅睇法，幫大家冷靜頭腦！」任總喺度寸邊個，盲嘅都睇到。

退休在即，任總話退休後有兩個重要任務同一個大難題要處理，前者係周遊列國去旅行，以及喺屋企菲傭放假時做家務；後者就係佢以前受制於利益衝突問題，最多只可以買樓投資，唔可以沾手任何股票，須知佢年薪過千萬，應該喺銀行儲埋一大筆，依家銀行又冇利息，所以相信佢今後就要為自己嘅巨額積蓄惆悵啦。一句講晒，任總講嘢真係寸到冇朋友！