ＴＶＢ揸弗人「六叔」邵逸夫每年九月都會應國家教育部邀請，率團北上巡視自己多年來捐贈嘅學校，但今年安排有變，改由「六嬸」方逸華搖旗帶隊。八日行程分別到天津、吉林長白山、山東曲阜、安徽黃山等地，一行四十多人尋日浩蕩出發，個個笑臉迎人，唯獨專程為太太送行嘅煲呔曾，見到卓妮即時黑面，莫非佢唔想曝光？
右手撞甩骹
六嬸擔大旗帶隊原意係唔想逾百歲高齡嘅六叔舟車勞頓咁辛苦，但六嬸話早幾日喺屋企唔小心撞親右手手㬹，無情力撞到甩骹，結果要負傷上陣，靠肩膊帶固定右手。卓妮慰問六嬸，問佢會否擔心行程出出入入影響手㬹傷勢？六嬸笑笑口話：「完全唔使擔心，因為隨團有好多大國手喺度，有乜事實有醫生幫手。」
大國手隨團
六嬸都講得啱，事關團內有好幾位醫生猛人，包括外科李國章（阿瑟王）、眼科何志平、被喻為「沙士英雄」嘅內窺鏡聖手鍾尚志。阿瑟王一如既往帶埋太太一齊隨團晒恩愛，仲話好開心可以去到孔子故鄉曲阜。肥平就只係一支公，因為「二十四孝母親」太太胡慧中要留港陪囡囡開學。至於已退休嘅鍾尚志，今年罕有地帶埋修讀設計嘅囡囡鍾翠珊（Sara）一齊隨團。
除咗幾位大國手外，隨團仲有李福善夫婦、其士集團主席周亦卿夫婦、東華三院主席李三元及煲呔曾太太鮑笑薇等。煲呔曾尋日勞師動眾，在多名保鏢護送下，親自送太太到機場，仲要兩人十指緊扣晒恩愛。
不過，一見到卓妮在場，煲呔曾即時黑面，曾太亦隨即彈開，行到離行離列。點知一見到卓妮舉機影相，兩人又擠出笑容，雖然勉強咗啲，但變臉絕技都算出神入化。
卓妮難得見到深居簡出嘅前高院法官李福善及太太，於是問李官點睇姪仔、首席大法官李國能提早退休？李福善一貫長輩語氣話：「佢大個仔喇，退休無問題，尊重佢嘅決定！」
卓妮