九龍城區議會呢款相當諷刺嘅燈飾，擺放喺亞皆老街近火車站天橋下面嘅馬路中間欄杆之上，嗰度人來人往，想睇佢唔到都好難。油尖旺區議員陳文佑話，曾經有海南島海口市旅客路經見到燈飾，發現唔妥，問佢點解自己家鄉會喺國家版圖中消失？

九龍城區議會負責籌備相關活動嘅籌委會副主席梁英標解釋，燈飾嘅中國版圖設計原稿，肯定有台灣同海南島，但係製造同懸掛就交由製作公司負責，佢都未知原來燈飾已經掛咗出街，區議會一定會跟進事件咁話。

其後，九龍城區議會秘書處再以書面回覆，指燈飾仍然安裝之中，工程未完成，尚未進入驗收程序喎。吓？咁都得，國家版圖係嚴肅事情，整咗一半就掛出嚟，咁政治不正確，究竟邊個要打手板？着衫唔着褲出街都唔得喇。