香港青年聯會領導層日前喺會展就職，儀式上嘉賓星光熠熠，原來下半場一樣無冷場，有成支國家跳水隊成員嘅親筆簽名「京奧」Ｔ恤，做神秘抽獎禮品。呢份驚喜壓軸大獎由青聯副主席、已故全國政協副主席霍英東長孫霍啟剛即場宣布捐出，啟剛女友、「跳水公主」郭晶晶個名仲雞乸咁大個字簽正喺心口位置，有錢都未必買到，將當晚嘅氣氛推向高潮。
啟剛現場無交代件Ｔ恤點得嚟，但係對一眾國家跳水隊「粉絲」嚟講，已經唔重要，禮物一出，全場歡呼，反應熱烈過一萬蚊現金大獎多多聲。啟剛親自上台抽出幸運兒同頒獎，有與會者講笑話，啟剛遞交禮物時，面上並無流露不捨表情，反映啟剛同晶晶感情穩定，因為真人都喺身邊，就唔使留住個簽名喇。
講開啟剛，佢對青聯事務愈嚟愈投入，另一位副主席、觀瀾湖太子爺朱鼎健（Ken）今日有份傳東亞運火炬，啟剛組織十幾個青聯兄弟上街，等Ken朱路經時打氣，佢咁落力，遲早抱埋青聯主席個位返屋企。