粉絲逼爆場館、爭影相、追星……呢啲場面唔一定只發生喺明星身上，科技大學校長朱經武尋日就示範咗咩叫魅力沒法擋。科大尋日為朱校長搞咗個歡送講座，成為朱校長連日來多個歡送節目嘅高潮，好多同科大有關嘅前官場中人都畀面出席，朱校長仲用《不帶走的一片雲彩》為題，講吓自己離任校長嘅感受，令現場瀰漫住一片離愁別緒。
朱校長話，嚟香港做咗八年校長，最開心嘅係睇住科大嘅學術地位不斷提升，學生個個前程錦繡，佢記得有一次，同太太喺尖沙咀買嘢無散紙，尷尬之際突然有個女仔幫佢哋畀錢，原來個女仔係科大嘅畢業生，見到校長有難即刻幫手，朱校長真係桃李滿門。
除咗畢業生，依家嘅學生都好錫校長，二百幾個學生自發搞咗個歡送會，人人揸住把印咗朱校長個樣嘅紙扇，個個爭住同校長影相留念，校長梗係有求必應，仲連有幾多個女友、喺邊度拍拖呢啲咁私人嘅問題都肯答，班學生最後大叫三聲「Paul Chu, we miss you」同校長最後話別。做校長做到咁，真係光榮之極。