招攬自由黨逃兵

發叔引用民協呢個咁極端嘅例子，究竟係想踩民協弱雞、定係暗嘲經濟動力好似民協咁人丁單薄呢？呢方面無謂作出揣測，但肯定嘅係發叔唔想搵只得三丁友嘅自由黨作比較，相當厚道。我哋早排打聽到經濟動力最近四出招兵買馬，搵發叔老人家出馬，四出游說現任無黨派或前自由黨區議員加入，但據聞反應冷淡，拍晒烏蠅，莫非發叔吹雞吹唔響？

不過根據發叔尋日嘅講法，其實佢仲係翹埋雙手，仲未親自出馬，但已經有好多人排住隊加入，佢繼而搬出自由黨立法會選舉戰敗後嘅黨員流失數字，話該黨黨員由六百幾人跌到四百幾人，相信唔少逃兵已經加入咗經濟動力大家庭。

人稱「新界王」嘅發叔心水咁清，佢計過條數冇人敢質疑，但相信佢口中加入嘅只係普通黨員，唔係人多就可以「嬲」死象，最重要係搵到有機會連任成功嘅區議員加入先至最實際，有區議員才能發揮地區影響力，甚至有樁腳參選立法會選舉。組黨一啲都唔簡單，相信佢老人家都好明白。

講開發叔，據聞鄉議局新大樓籌建善款數字直線上升，但工程費亦都超支超過一成，由一億三千萬升至一億五千萬元，主要因為局方上下要求新大樓盡善盡美，將概念變為現實，加上物價上升，超支實在難免。發叔透露，依家仲欠幾千萬埋尾，所以積極搵未科水嘅大孖沙慷慨解囊。對於幾個月前分別捐出五百萬元嘅大孖沙，發叔就呻笨話太早叫佢哋捐錢，如果早知個股市升得咁勁，肯定開價千萬元，相信一定水到渠成。