會展尋晚變成女人天下，婦協主席林貝聿嘉、玩具大王蔡志明太太李惠莉、邱德根新抱吳惠平、美容一姐鄭明明、蔣震千金蔣麗芸，仲有前民政事務局常秘媽打李麗娟及立法會秘書長吳文華，各人盡出私伙靚旗袍突圍。鄭明明話喺「花嫁」訂造紅色旗袍，配上一對紅寶石耳環，貴氣十足；媽打李麗娟就搵來名設計師Benny Yeung訂造粉紫色通花旗袍，仲首次黐上假眼睫毛；立法會議員葉劉淑儀都唔執輸，搵咗件十幾年前買落嘅Ungaro金色旗袍配喱士外套。逾千名阿太當中，竟然冇人撞衫，你話女人嘅扮靚觸覺幾敏銳呢！

婦協成員着旗袍魚貫入會場。 （溫國佳攝）

李麗娟（右）一生人中尋日首次黐上假眼睫毛，仲遇上舊上司黃錢其濂，特別開心。

范太着旗袍搵唔到工

卓妮環顧台上一班阿太，發現當中有一位「異類人士」，佢着咗一套紫色唐裝衫褲，心口掛住一塊由媽媽送贈嘅大玉墜，打扮較中性，睇真啲原來係范太喎。范太自爆好憎着旗袍，所以無跟大隊：「我對上一次着旗袍，係六七港大畢業後造咗幾件旗袍去見工，點知冇一份見得成，自此之後就唔再着旗袍嘞。」

范太又笑言，着旗袍箍住條頸，感覺侷促，所以尋日本來有阿太邀請佢上台表演大合唱助興，當知道唱歌要着旗袍後，就寧願唔唱喎。

打鼓跳舞Rap歌唱聖詩

不過范太絕無欺場，改為同李麗娟、蔣麗芸、林貝聿嘉等人表演打山西鼓，節奏感十足；葉劉淑儀扮「潮人」，同班後生仔邊跳邊Rap歌；蔡志明太太捉埋兩位千金蔡加敏及蔡加怡上台唱聖詩，母女檔合拍到極，贏得唔少掌聲。

卓妮