本文重點
【本報訊】阿婆殺手李瑞香恍如雙面人，案件主管西九龍總區重案組偵緝高級督察陳大偉坦言，李犯案手法兇殘，將阿婆紮起封口扑頭，竟為了區區千多元便殺人滅口。但據她與孻仔孫兒同住村屋的左鄰右里形容，李瑞香只是個普通師奶，而且為人斯文有禮，對家人亦照顧周到。無怪查案經驗豐富的探員亦不諱言：「睇唔出佢係連環殺手！」
湊孫返學兒子孝順
李瑞香報住元朗洪水橋一村屋，該村村民透露她於○六年底遷入，與在超市任職的孻仔及一名八、九歲大孫女同住，平日見她出入都只是「湊孫」返放學。街坊觀察到被告的兒子頗孝順，只是因工作關係要經常夜歸。
在街坊眼中，李瑞香斯文有禮，見人都會打招呼，臉上總掛着笑容，大時大節更會向街坊送禮送月餅。但普通師奶原來是連環殺手，街坊坦言：「完全諗唔到，就算嗰時警方懸紅緝兇出埋佢張相，都無諗過係佢喎！」
街坊回想○六年底李瑞香到村內打聽表示想租屋，看中現居單位便二話不說簽約，翌日即時遷入。
街坊說當時她自稱「好慘」，遭人加租迫遷，終以二千元租得單位，現在回想才覺得被她騙了。街坊指李一家每月準時交租，打扮絕不寒酸，不認為她有經濟困難。而自她被捕後，其孫女乏人照顧，要自己返學及放學，遇上叔叔工作夜歸，便獨自到村口士多買公仔麵充飢。