食物及衞生局局長周一嶽尋日又要烚熟狗頭咁出嚟認衰。佢話喎，對伊利沙伯醫院調錯嬰兒事件感到難過及遺憾。呢句口是心非嘅道歉，當事人收唔收貨就唔知，但點解好似咁熟口熟面、似曾相識嘅？

當然啦，對事件表示遺憾及難過，幾乎已經成為周一嶽嘅口頭禪。嗱嗱嗱，今年四月東華醫院一名七十歲老婦疑服用劑量雙倍嘅癲癇藥苯巴比妥後死亡事件，當時周一嶽咪又係好似人肉錄音機咁話對事件相當「遺憾」。鬼咩，公共醫療系統三日唔埋兩日都爆單醫療事故，梗係駕輕就熟啦。話時話，講完之後又點？咪又係冇吸取過教訓。

以今次為例，成班伊院管理層依然死撐話冇刻意隱瞞，仲話冇及早公布，係基於保障私隱及尊重女嬰家長意願先唔主動講出來。聽到啲咁無賴嘅解釋，小市民係咪應該仲難過、仲遺憾十萬倍呢？

唔好講笑啦，公立醫院前線醫護人員三番四次遺失ＵＳＢ手指，一向當病人私隱冇到，私隱專員公署多次去信醫管局表達極度關注都冇用。恕功夫茶孤陋寡聞，到底公立醫院幾時開始咁注重市民嘅私隱？

最搞笑嘅係，呢班友仔唔止將呢單嘢收埋唔畀市民知，連佢哋嘅頂頭上司、堂堂一個周局長，原來比一般小市民仲遲知道。周一嶽自爆伊利沙伯醫院公布事件之後，當晚深夜先至有人通知佢！

成件事簡直係匪夷所思，計功夫茶話齋，當中只有兩種可能：一係周一嶽講大話，一係醫管局班大帝個個鍾意隱瞞上司，唔放佢在眼內，諗住要跣到局長大人一仆一碌，跣到佢攤攤腰都唔定。

不過你知周一嶽份人啦，一向渾渾噩噩、後知後覺，除咗「周一鑊」之外，亦有「周渾噩」、「周後覺」嘅稱號，咁佢唔知又唔出奇。

年前之嘛，周一嶽管轄嘅食物安全中心已經跣過佢一鑊，當時內地揭發有蘇丹紅毒蛋，周局長係威係勢咁行出嚟，拍晒心口話毒蛋冇輸港，殊不知事實上係有嘅，只不過食安中心冇話佢知，搞到佢事後要死死氣咁Say Sorry，真係瘀到爆呀。

呢次周一嶽又話好關注調錯嬰兒事件，認為絕對唔應該發生，真係信佢半成都死。喺周一嶽嘅管理下，藥到病除、救死扶傷呢啲本來應該發生嘅事情時常唔發生；但打錯針、輸錯血、割錯乳房呢啲冇可能發生嘅事故，竟然無日無之，你話奇唔奇吖？

難為周一嶽好似唔關佢事咁，自己置身於事外，只係要求醫管局加強培訓及監管前線員工，訓示員工工作時要專心以及有承擔。

唔該周一嶽照吓鏡先講啦，其實最應該加強培訓、最應該要有承擔嗰個係佢至真。又難怪佢啲下屬一個二個要掟蕉皮跣佢啦！但跣還跣，唔該各位醫護人員高抬貴手，冤有頭、債有主，千祈咪搵無辜小市民嚟較飛！