唔揪得喺早前工聯換屆選舉，輕易揪低其他大熱同黑馬，當選理事長，成為工聯新星，不過，同時亦有代價，荷包作出犧牲。醫管局資訊科技培訓經理保守估計月薪至少五萬元，再高幾成都絕對唔出奇，而工聯會理事長則介乎三萬至五萬元，睇嚟唔揪得今次屬減薪從政，聽聞佢作出決定前，心理亦經過一輪掙扎。咁又係嘅，唔揪得今年先至三十九歲，咁快要為事業前途押注，點可以唔戙高床板，諗多幾個通宵？

外界估計，身形高瘦嘅唔揪得，將會成為工聯培育嘅直選戰將，好有機會喺三年後出戰，從呢個角度睇，佢全職瞓身工聯會務，變得合情合理，第日一旦當選，今日嘅付出，就可連本帶利返番嚟啦。不過，投資總有風險，唔揪得要有心理準備至得。