近排喺政府全民皆兵狂煲禁毒嘅效應下，應該都無乜人仲記得喺豬流感肆虐嘅時候，由政務司司長唐英年（唐唐）領軍搞嘅全城清潔大行動喇。尋日唐唐就出席咗全城清潔大行動嘅下一波「全城動‧義工響應全城清潔運動」嘅開展禮，仲做騷式帶領一眾嘉賓抹展板，點知佢哋抹極都唔乾淨，場面尷尬。
話說今次嘅啟動儀式非常特別，要一眾主禮嘉賓倣效抹窗，用海綿同百潔布嘅合體，抹乾淨一塊黃色嘅板，原本嘅設計，係大家抹吓抹吓，「全城清潔運動」嘅標誌就會重現大家眼前。就係因為咁，好少有機會掂到清潔用品嘅唐唐，就好落力咁喺塊黃板上面抹呀抹。
但唔知因為大家少抹窗，定係個儀式嘅設計有問題，包括唐唐在內嘅七位嘉賓抹極都抹唔乾淨，個標誌久久都未能露面，結果擾攘咗成分鐘先完成個啟動儀式。成件事真係夠晒整蠱。