唔講唔知，張文原來係著名畫家梵高嘅忠實粉絲，今次佢嘅法國之旅，主要目的就係追尋梵高死前最後嗰二十九個月嘅足迹，親身感受吓佢偶像嘅所思所想、所見所聞，以及其畫作中嘅真實景色。張文亦出晒名鍾意睇英超聯，今次佢喺英國就睇晒英超四大球會曼聯、阿仙奴、利物浦同車路士嘅季前熱身賽，過足波癮。

不過張文同太太最想見到嘅，當然係去咗英國讀財務數學系碩士嘅囡囡。佢話阿女依家喺一間英國著名嘅資訊科技公司實習緊，過埋今年就會畢業返港。佢又話今次喺歐洲玩足三個星期都有代價，就係一返到香港就忙到飛起，包括同教育界商討校本驗毒、同泛民主派開會傾政改立場，以及幫手收拾「我要回家運動」雙胞案嘅爛攤子，真係有排佢煩。