意粉咬口 先夠正宗

Alan嘅菜式係香煎上海菜肉雲吞，佢話呢味係外母嘅拿手點心，由自己同太太拍拖食到依家，足足食咗卅年，果然切合主題「最窩心的菜」。卓妮一睇就知Alan唔識煮餸，不過勝在有心，Alan話已經學咗兩日，水餃亦都包得愈來愈有技巧，今朝比賽前仲特登喺屋企包多次，比賽時果然似模似樣，不過就難為佢屋企人食足兩日水餃。

以意式魷魚汁海鮮意粉應戰嘅鄧達智話一直喺外國長大，擅長煮咖喱同意大利菜，今次意粉更加係鄧媽媽嘅至愛。試過連續幾年暑假都遠赴意大利學廚嘅鄧達智，話意粉要有少少咬口先至夠正宗。佢仲教大家，可以將煮好嘅意粉撻上牆，如果唔跌落地下，即係代表已經熟啦。不過鄧達智就梗係已經過咗呢個「撻意粉上牆」嘅階段啦。

至於新進食家Stephen決定再以平、易煮、又好味嘅「鹹魚炒蛋」出賽，最後仲拎埋由觀眾選出嘅大獎添。Stephen講笑話鍾意食海鮮，但又無錢，惟有食曾經係海鮮嘅鹹魚頂檔喎。

卓妮