本文重點
港交所主席夏佳理（Ron）前晚又相約傳媒好友食飯聚會，今次搞搞新意思，唔再去跑馬地馬會會所，大熱天時去咗灣仔打邊爐，仲預早訂咗兩隻新鮮靚蟹，每隻蟹有兩斤重。卓妮原本叫阿Ron揸住隻靚蟹影番張相，但咁啱前日港股下跌七百幾點，佢即時聞「蟹」色變，講笑話揸住「蟹貨」唔好意頭，擔心見報被股民鬧死喎。其實大家將隻蟹食咗落肚，咪唔怕大蟹橫行囉。
身兼行政會議成員嘅阿Ron每次同傳媒聚會，例牌會打賭當前政圈熱門話題，最近政圈相對淡靜，眾人最終決定以泛民五區總辭來開盤，由阿Ron做莊，話如果有五個泛民議員辭職就一賠五，無人辭職就五賠一，如此類推。
17歲細仔 非常有型
卓妮去參加聚會之前，中午在中環威靈頓街遇到阿Ron同十七歲嘅細仔Max食晏，無見阿Max一年多，個人成熟咗好多，仲非常靚仔兼有型。阿Ron大部分仔女已經成家立室，只剩下阿Max仲未放得低，特別係佢太太夏安麗，一直唔捨得畀個仔到外國升學，所以阿Max至今仍留在香港讀書。講開又講，阿Ron稍後會陪太太返奧地利娘家探親，之後會去史特拉斯堡聽音樂，輕鬆吓再搏殺。
卓妮