立法會每隔一段時間，就會同每個區嘅區議員會面同食飯，一般會安排喺星期四上午十點四十五分至下午兩點鐘進行，但由於啲議員發言愈來愈長氣，令每個星期三舉行嘅立法會大會愈開愈長，往往需要喺翌日上午續會，最終要將原定同區議員嘅會面改期。喺今年嘅六月底，北區同中西區區議會就係因為呢個原因，畀立法會放咗飛機。

立法會一般會安排十四名當值議員出席有關會面，但由於啲議員成日因為撞會或其他私人理由遲到甚至玩失蹤，有時連五名議員嘅法定人數要求都達唔到，令對方覺得好不受尊重。例如今年七月初同九龍城區議會會面，就爆出八名議員集體遲到甩底嘅鬧劇，去年三月同屯門區議會會面，議員嘅出席率亦唔見得人，令嗰兩個區嘅區議員非常火滾。

譴責減人工 先有阻嚇力

為咗改善有關情況，立法會秘書處尋日向全體議員發出諮詢文件，建議將有關會面改喺星期一、二或五舉行，以免因為星期四上午要繼續開大會而被迫改期。另一個方案係如果一早定咗要同區議會會面，該個星期四嘅立法會續會就會改喺下午兩點半先開始進行，而唔係往常嘅上午九點鐘。呢個方案最受影響嘅應該係政府，因為咁會令立法會足足少咗成五個半鐘開會審議法案。

對於議員嘅出席率問題，秘書處建議今後除咗十四名當值議員之外，五名喺立法會申訴部當值嘅議員，亦有責任出席有關會面，希望合共十九名議員當中，總會搵到五個人得閒見吓班區議員；各個立法會委員會以後編排開會日期時，亦要盡量避免同區議會嘅會面撞期。不過有關建議都要班議員肯自重自律先得，其實不如好似一啲政黨咁，遲到要罰錢減人工，放飛機嘅更加要被公開譴責，咁先至會有阻嚇力。