黃大仙摩士公園泳池被發現大腸桿菌及細菌嚴重超標，要關閉清潔，諗起都毛管戙呀。喂，呢隻菌係大腸桿菌，唔係益生菌，據傳染病專家表示，如果泳池所含大腸桿菌屬毒性較強嘅品種，泳客唔小心飲咗含菌池水，輕則肚屙，嚴重啲仲會引致眼睛發炎及皮膚敏感，後果可大可小。

最弊就係班高官好似飲慣大腸桿菌水，一啲都唔覺得有問題。負責管理公共泳池嘅康文署，查都未查就一口否認池水有糞便。而民政事務局副局長許曉暉仲搞笑，佢話經調查後，過濾系統運作正常，呼籲泳客尊重泳池守則，保持池水清潔。

冇錯，泳客固然要遵守泳池守則，亂咁污染池水，確係冇乜公德心。問題係，保持池水清潔本來就係康文署嘅職責，佢哋居然將個波交番畀泳客，咁使唔使呼籲泳客帶埋網去游水，有垃圾糞便見一件撈一件？

計功夫茶話齋，成件事都幾唔尋常，原來唔單止摩士公園泳池咁污糟，堅尼地城及天水圍泳池亦被驗出泳池細菌量超標，到底康文署有冇認真徹查係咪過濾系統出咗問題？有冇泳池員工吞泡冇做好清潔工作呢？拯溺員工會懷疑事件可能涉及人為疏忽，喺清理過濾系統時程序出錯，搞到本來應該排出嘅污水倒流入泳池。講到尾，事件反映康文署做事得過且過嘅官僚作風。

公共泳池有垃圾以及糞便載浮載沉，一啲都唔罕見，最經典嘅一單發生喺將軍澳泳池，有泳客游游吓見到有隻活生生嘅老鼠喺水中暢泳，當堂嚇到面青口唇白，走都走唔切。

講開又講，其實依家去泳池游水真係搵命博㗎，康文署對泳池嘅管理亂七八糟，將救生員工作外判，由冇拯溺經驗嘅收費處職員頂替救生員都做得出，簡直係罔顧人命。

仲有呀，去泳池戴泳鏡都未夠，或者要戴防生化武器嘅豬嘴面罩至頂得順。呢嗱，荃灣荃景圍胡忠泳池早前有救生員被確診豬流感，但康文署竟然冇即時向外公布，你話冇隱瞞咩，打死都冇人信。

你知啦，救生員嘅工作，好多時有機會同泳客接觸，一個唔好彩有人遇溺，救生員要施行人工呼吸急救，泳客隨時因此而中招都唔定，本港已經有豬流感感染者死亡個案，唔驚就假咯。

唉，連管理泳池咁簡單嘅事都搞到烏龍百出，可見康文署署長周達明真係廢到冇朋友，但咁又有乜所謂吖，特區政府向來都係賞惡罰善㗎啦，周達明管樹一塌糊塗、管泳池變成一池糞水，唔單止冇受罰，仲紮職做發展局常任秘書長，真係講都冇人信。

不如咁喇，叫周達明自己去摩士公園泳池游番幾個塘，睇吓佢會唔會游到一口都係！