瓜子面形

首先面形要下巴尖尖，據梁師傅講，方面形嘅女性，辦事能力較高，配埋顴高眼銳嘅話，一副女強人本色，本地不少大企業嘅女高層，都係咁嘅面相，佢哋日理萬機，手下駕馭嘅男人，冇一千都有幾百，但係咁強悍嘅女性，有幾多男士會喜歡呢？

相反如果下巴尖尖，即係「瓜子面形」嘅女性，佢哋做嘢只能專攻一科，例如好多影星歌星，都係呢種面形，佢哋專注喺一個事業裏面，都會有成就，而且少了份霸氣，容易討人歡心，所以從事演藝界嘅女性，大多數都擁有尖尖嘅下巴。

另外，眼神方面，唔能夠太銳利，眼睛以圓大最好，梁師傅話眼睛圓大代表為人思想開放，感情豐富，好奇心強，喜歡主動去接觸人和事，眼睛如果大得嚟仲水汪汪嘅，唔使問都知道係桃花勁旺，深得男士嘅歡喜，絕對係人見人愛嘅類型。

彎月眼眉

除咗眼睛要又圓又大之外，據梁師傅講，仲要有對靚眼眉嚟配合，面相學中，眉毛主人嘅思想同有冇貴人相扶，如果女性生得一對粗眉，表示作風我行我素，性格倔強，唔會點聽人勸，配埋個高鼻，更加獨立自主，要得男士歡心，睇嚟都幾難。

所以梁師傅話要做萬人迷，條眉唔可以粗，幼幼一條彎月眉就夠晒，眉尾切勿向上，宜向下垂最佳，呢種眉嘅女性，畀男人嘅感覺係嬌滴滴咁樣，好似唔好好保護佢哋，都生存唔到落去，於是激發男人嘅英雄主意，要好好保護佢哋，愛錫佢哋！

另外，眉與嘴要相配，如果眉毛纖幼，但生得一副血盆大口，咁就幾難有人喜歡。眉毛纖幼，配一個小嘴，咁就冇得頂，但如果天生小嘴，但生得眉毛粗黑，梁師傅建議一定要修修眉毛，配番個嘴形，唔講相學，單講美觀，都比較好睇啦！

鼻高肉厚

最後要留意鼻，相書話鼻嘅作用係「男管財、女管夫」，個鼻生得好唔好，可以話相當重要，特別係女性，可以從中睇到得唔得丈夫歡心、可唔可以享夫福嘅訊息，如果鼻扁，就得唔到丈夫尊重；鼻薄無肉，就唔可以享受夫福；鼻孔外露，財難聚。

所以如果鼻樑又高又直，鼻頭有肉，加埋鼻翼有肉，鼻孔唔係太露嘅話，呢種女性深得丈夫愛錫，更可以分享丈夫嘅財富，係享盡夫福嘅少奶奶命，就算未結婚嘅女性，都會有好多異性愛錫，就算工作都唔使受好多苦，婚後更一世衣食無憂。

至於身材方面，梁師傅話，近年興纖體修身，喺相學嚟講，原來肥瘦都冇關係，只要有以上三個特點，就能成為萬人迷，深得男士嘅喜愛。另外，有人話女士走路時身體擺動，會特別吸引異性，梁師傅話千祈咪信，女性行路應以穩重最為重要。

撰文：賢

鳴謝：玄學家梁瑋鈞師傅